"حكمة ربنا"

أهم بوست أكتبه واللي اتعلمته من كل الفترة اللي فاتت دي فلو جه قصادك احرص علي قراءته :) "حكمة ربنا" دي شبه بالظبط النضارة .. بس نضارة غريبة شوية .. ليها خصائص عجيبة مش في اي نضارة ! النضارة دي بتكشفلك الحقيقة اللي انت مش حاسس بيها :) علي سبيل المثال :) ٭ عارف .. ممكن تبقي ماشي في طريق كله شووك وعمال تتجرح في رجليك وتنزف .. وتقول آآه .. هو ليه ياربي طريقي كله ألآم كده .. ياربي مش كنت اختارتلي طريق أسهل .. ليه العذاب ده كله !! :'( وتقوم لابس النضارة دي فتشوف اللي عمرك ما كنت تتوقعه !! :) تلاقي ان كان قدامك ٣ طرق .. أول طريق مليان براكين .. بتغلي .. لو لمست جلدك هتنتحول لـكومة رماد في لحظة وتموت ! وتاني طريق مليان ذئاب وضباع ووحوش .. لو شموا ريحتك بس هينهشوا لحمك في ثواني وتموت ! وتالت طريق هو اللي انت مشيت فيه .. اللي كان مليان شوك ! تفتكر لو كنت لبست النضارة من الأول وبصيت علي ال٣ طرق !! كنت هتقول ليه يارب ؟! :) طب ازاي تقول ليه يارب وانت أصلاً ماشي في أسهل طريق متاح ليك :) ٭ طب هسألك سؤال .. لو معاك شنطة كبيييرة مليانه كِور صغيرة .. وانت مطلوب منك تمد ايدك وتطلع كورة واحدة بس ، بس بشرط .. تكون مغمض عنيك !! وبالفعل عملت كده ودخلت ايدك جوه الشنطة وطلعت كورة واذا بك تتفاجئ انها كورة فضة !!! ايـــه ده انا كنت عاوزها دهب !!! :( فتزعل وتحزن وتتمني لو كان حظك افضل من كده ! في حين انك مش عارف ان الشنطة كللللها كور بلاستيك ! :) حد فهم قصدي !؟ انت زعلت ان حظك طلع كورة فضة ، لانك فاكر ان الشنطة فيها كور دهب !! والحقيقة اللي انت مش عارفها لانك لا تعلم الغيب ، ان الشنطه مفيهاش غير كور بلاستيك وكورة واحدة بـــس فضة :) والكورة دي كانت من حظك انت :) شوفت انت عاكس الآية ازاي !! فاكر ان حظك وحش وانت مفيش احسن من حظك ! :) الشنطة دي هي دنيتك .. والكور دي هي الأقدار ! ربنا هدي ايدك انها تمسك الكورة الفضة .. رغم انها الوحيدة اللي فضة والباقي بلاستيك ! عشان ربنا بيختارلك أحسن الأقدار :) اللي لو انت اطلعت عليها وشوفت كل الكور اللي في الشنطة هتفهم كويس اوي انك لو خيروك بين اقدارك هتختار القدر اللي ربنا اختاره ليك من الأول :) ❤ !! ٭ ممكن برضو تكون عمال تدعي بدعوة بقالك سنين وسنين .. وتيجي عليك لحظة تقف مع نفسك كده وتقول .. لا لا انا ازاي كنت غشيم كده !! الموضوع مستحيل أوي .. باينه أهي مش محتاجة تفسير !! و لما لبست النضارة فضلت تعييييط :''') !! عارف بتبكي ليه .. لان النضارة كشفتلك ان باقيلك علي استجابة الدعوة كام يوم .. وبينتلك ان لو كانت دعوتك اتحققت في الوقت اللي انت عايزه كانت هتروح منك تاني .. لان وقتها الموضوع هيكون ضعيف .. لكن مع الوقت كان ربنا بيقوي الأسباب عشان دعوتك تستجاب كما ينبغي !! :) وغيرها أمثلة كتيييير اوووي مش هتبان غير لما نلبس النضارة :) ! طب وهي النضارة دي نشتريها منين !! اكيد كلنا بنسأل علي سعرها وعلي مكان بيعها !! اكيد لو كانت بتتباع كنت اشتريناها كلنا :) !! اكيد كانت هتوفر علينا عبئ الانتظار واللهفة والدعاء والبكاء و .. و .. :) بس اللي مش هتتخيله بقي .. ان من رحمة ربنا بيك ان النضارة دي مابتتباعش في أي مكان :) حكمة الله لا يعلمها أحد سِواه .. اينعم ممكن يكشفلك جزء منها في الدنيا .. ولكن مش الحكمة الكاملة .. :) ! طب عارف ليه ان من حب ورحمة ربنا بيك انه يخفيها عنك ؟! :) عشان تدعيه ،، عشان تقرب منه ،، عشان قلبك يبطل يحب الدنيا اوي كده ،، عشان تعرف ان الدنيا مهما كانت فيها ملذات فهي مليانه اضعافها أتعاب ،، عشان قلبك يتعلق بالجنة ،، عشان تعمل ليها وتستحق تدخلها ،، عشان تعرف ربنا أكتر ،، ربنا انت تعرف عنه إنه إلهك .. انه خلقك .. لكن متعرفش اوي انه القادر ،، انه الوهاب ،، انه الكريم ،، انه السميع ،، انه القريب ،، انه الودود ،، انه فعلا فعلا الحكيم :) ! تخيل بقي لما توصل للي انت عايزه .. وكمان تكون كسبت كللللل المعاني الجميلة دي :) ! اخدت متاع الدنيا .. بس في نفس الوقت ماتعلقتش بيها ومانسيتش الجنة بسببها :) ! عشان كده اذا غابت عنك الحكمة فلا يغب عنك الحكيم :) ! ٭ كل الأمثلة دي بتتلخص في آية عظيمة اوي .. بتقول .. "والله يعلم وأنتم لا تعلمون" :) وبرضو بتفكرني بالآية اللي بتقول " وعسي أن تكرهوا شيئاً ويجعل الله فيه خيراً كثيراً" :) مش بس خير .. لا لا ده خير كتييييير :) !! عارف .. يوم من الأيام هتحس انك مكسبتش من ابتلائك وطول صبرك ده غير انه قربك من ربنا :) هتنسي حلمك اللي وصلتله .. وهتتعود علي وجوده .. :) لكن هيكون ربنا ملأ قلبك ... ذرات دمك بتذكر الله أكتر منك .. كل ذرة في جسمك تشهد حقاً ان الله قادر .. ان الله قادر .. ان الله قادر