"مَنْ مَشَى فِي حَاجَةِ أَخِيهِ، وَبَلَغَ فِيهَا -أي قضاها- كَانَ خَيْرًا لَهُ مِنْ اعْتِكَافِ عَشْرِ سِنِينَ"

في يوم سيدنا ابن عباس كان قاعد مُعتكف في مسجد رسول الله صلى الله عليه وسلم.

فدخل رجل المسجد فسلم على سيدنا ابن عباس وقعد جنبه، فسيدنا ابن عباس لاحظ إن الرجل حزين جدًا وفي حاجة مضيقاه، فسأله وقال:"أراك حزينًا"؟

فالرجل فعلًا طلع حزين وشايل هم؛ لإنه عليه فلوس لحد، وجه وقت دفعها، وهو للأسف مش معاه الفلوس، ومش عارف يعمل إيه

فسيدنا ابن عباس للأسف ماكنش معاه فلوس يدفعها للرجل، فعرض عليه إنه يروح يكلمله الرجل عشان يـصبر عليه ويأجل معاد الدفع.

فالرجل وافق ورحب جدًا بعرض سيدنا ابن عباس.

وفعلًا سيدنا ابن عباس قام من مكانه وقطع اعتكافه وخرج من المسجد عشان يروح يكلمله الرجل، والاعتكاف أمر عظيم جدًا ماينفعش حد يقطعه غير لضرورة شديدة، فالرجل استغرب وقال لابن عباس:"أنسيت ما كنت فيه؟ "

فسيدنا ابن عباس بص ناحية قبر رسول الله صلى الله عليه وسلم وعينه بدأت تدمع وقال سمعت صاحب هذا القبر، الكلام والعهد به قريب، يقول :"مَنْ مَشَى فِي حَاجَةِ أَخِيهِ، وَبَلَغَ فِيهَا -أي قضاها- كَانَ خَيْرًا لَهُ مِنْ اعْتِكَافِ عَشْرِ سِنِينَ"

صاحبك أوقات كتير بيحزن، بيكتئب، بيقع في ضيقة، فبيحتاجك وبيحتاج مساعدتك، بلاش تسيبه، ساعده باللي تقدر عليه، وخليك دايمًا جنبه وعرفه إنك معاه مهما حصل

ساعد أي حد محتاج مساعدة، خليك شخص يمشي في حاجة الناس، الأجر عظيم جدًا